"ನಮ್ಮ ಮೆಟ್ರೊ" ಜನ ಒಪ್ಪಿದರೋ ಬಿಟ್ಟರೋ ಅಂತೂ ಹೊಸದೊಂದು ಅತ್ಯಾಧುನಿಕ (ನಮ್ಮ ಮಟ್ಟಿಗೆ) ಸಂಚಾರ ವ್ಯವಸ್ಥೆಗೆ ಇದೇ ಹೆಸರು ಬಂದುಬಿಟ್ಟಿತು. ಇದಕ್ಕೆ ಮೊದಲ ದಿನವೇ ದಕ್ಕಿದ ಸ್ಪಂದನೆ ನೋಡಿದರೆ ಈ ಹೆಸರು ನಿಜವಾದ ಅರ್ಥದಲ್ಲಿ ಅತ್ಯಂತ ಸೂಕ್ತವೆನಿಸಿತು. ಯುರೋಪ್ ಮತ್ತಿತರ ಮುಂದುವರಿದ ದೇಶದ ಜನರ ಹಾಗೆ ನಾವಿದನ್ನು ಎಷ್ಟರಮಟ್ಟಿಗೆ ಉಪಯೋಗಿಸಿಕೊಳ್ಳುತ್ತೇವೆ, ನಮ್ಮದಾಗಿಸಿಕೊಳ್ಳುತ್ತೇವೆ ಅನ್ನೋದು ನಮ್ಮ ಮುಂದಿರುವ ಪ್ರಶ್ನೆ.
ಎಂಜಿ ರಸ್ತೆಯುದ್ದಕ್ಕೂ ಅವತ್ತು ಸೇರಿದ ಜನ ಅಬ್ಬಾ! ಟಿಕೆಟ್ ಗಾಗಿ ನಿಂತ ಕ್ಯೂ ಹನುಮಂತನ ಬಾಲದಂತೆ ಬೆಳೆದಿತ್ತು. ಅವತ್ತು ರಾಜಕೀಯ ಮೈಕ್ ಗಳ ಭರಾಟೆ, ಮಾರುಕಟ್ಟೆ ಶಕ್ತಿಗಳಿಗೆಲ್ಲ ಹಬ್ಬ! ಬಹುತೇಕ ಅಂಗಡಿಗಳು ತಮ್ಮನ್ನು ತಾವು ಸಿಂಗರಿಸಿಕೊಂಡು ಹರೆಯದ ಹುಡುಗಿ ಕಾಮದೇವನ ಕಾದುನಿಂತಂತೆ ಕಾಣಿಸುತ್ತಿದ್ದವು. ಅರ್ಧ ಕುಂಡೆ ಕಾಣಿಸುವಂತೆ ಜೀನ್ಸ್ ತೊಟ್ಟ ಲಟಪಟ ಸುತ್ತುತ್ತಿದ್ದ ಸುಂದರಿಯರಂತೆ ಕಾಣಿಸುವ ಹೆಣ್ಣುಗಳು, ಮತ್ತವರ ಹಿಂದೆ ಕಣ್ಣು ಮಿಟುಕಿಸದೇ ಸುತ್ತುವ ಹಪಾಹಪಿ ಹರೆಯದ ಗಂಡುಗಳು... ಏನ್ ಮಜಾ ಅವರದು.
ಮತ್ತೆ, ಇದ್ದಬಿದ್ದ ಕೋಟು, ಸೂಟು ಹಾಕಿಕೊಂಡು ಎಂಜಿ ರಸ್ತೆಗಿಳಿದ ರಿಟೈರಮೆಂಟ್ ಹೊಸ್ತಿಲಲ್ಲಿರುವವರು , ಯೌವ್ವನದ ಬಿಡುಬೀಸನ್ನೆಲ್ಲ ಕಳಕೊಂಡರೂ ಚಮಕ್ ಬಿಟ್ಟುಕೊಡದ 40 ಪ್ಲಸ್ ಆಂಟಿಯರು ಮಗಳಿಗೂ ಕಾಂಪಿಟಿಷನ್ ಕೊಡುವವರಂತೆ ಸಿಂಗರಿಸಿಕೊಂಡು ಮೆಟ್ರೋ ರೈಲು ಟಿಕೆಟ್ ಗಾಗಿ ಕಾದಿದ್ದೇ ಕಾದಿದ್ದು.
ಇನ್ನು ಮೊದಲ ಬಾರಿಗೆ ಮೆಟ್ರೊ ಹತ್ತಿದವರದು ಏನ್ ಕೇಳ್ತಿರಾ! ಏಯ್ ಅಲ್ನೋಡು ಕಬ್ಬನ್ ಪಾರ್ಕು, ಕಿಡ್ಸ್ ಕೆಂಪ್, ಏಯ್ ಲಿನೊ ಥಿಯೇಟರ್... ಇಲ್ಲೇ ಅಲ್ವಾ ನಾವಿಬ್ಬರು ಮೊದಲ ಬಾರಿಗೆ ಆಫೀಸಿನವರ ಕಣ್ಣಿಗೆ ಮಣ್ಣೆರಚಿ ಸಿನಿಮಾ ನೋಡುತ್ತ ಲೊಚ ಲೊಚ ತುಟಿ ತುಂಡರಿಸಿಕೊಂಡಿದ್ದು ಎಂದು ಕನವರಿಸುವ ಓಲ್ಡ್ ಲವರ್ಸ್, ಛೇ, ನಾನವನ ಮೊದಲ ಬಾರಿ ಕೈಹಿಡಿದುಕೊಂಡು ಕೂತಿದ್ದು, ಅವನು ನನ್ನ ಹೆಗಲ ಮೇಲೆ ಕೈ ಹಾಕಿ ಕೆನ್ನೆ ಸವರಿದ್ದು, ಮೈತುಂಬ ಕಚಗುಳಿ ಇಟ್ಟಿದ್ದು, ಸಾಂಗ್ ಬಂದಾಗ ನಾ ಬೆಚ್ಚಗೆ ಅವನ ತಬ್ಬಿಕೊಂಡು ತೆಳುವಾದ ತುಟಿಗಳಿಂದ ಉಮ್ಮಾ ಎಂದಿದ್ದು ಈ ಪ್ಲಾಝಾ ಥಿಯೇಟರ್ ನಲ್ಲೇ ಅಲ್ಲವಾ! ಅರೇ ಇದೇನಿದು ಪ್ಲಾಝಾ ಮಂಗಮಾಯ! ನನ್ನ ಸುಂದರ ನೆನಪುಗಳನ್ನೆಲ್ಲಾ ಗುಡುಸಿಹಾಕಿಬಿಟ್ಟಿತಾ ಈ ಮೆಟ್ರೊ ಎಂದು ಇತಿಹಾಸದಿಂದಲೇ ಅಳಿದುಹೋದ ಥಿಯೇಟರ್ ಅವಶೇಷಗಳನ್ನು ನೋಡಿ ಮರುಗುವ ಭಗ್ನಪ್ರೇಮಿಕೆಯರು... ಹೋ ಇನ್ನು ನೀನು ಟ್ರಾಫಿಕ್ ನೆವ ಹೇಳಲಿಕ್ಕೇ ಇಲ್ಲಾ. ಸೀದಾ ಆಫೀಸು ಮುಗಿದು ಹತ್ತು ನಿಮಿಷದಲ್ಲಿ ಮನೇಲೇ ಇರಬೇಕು. ಇಲ್ಲಾಂದ್ರೆ ಡಿವೋರ್ಸ್ ಎನ್ನುವ ಹೊಸದಾಗಿ ಮದುವೆಯಾದ ಜೋಡಿಗಳು ತಮ್ಮಲ್ಲೇ ಒಣಜಗಳವಾಡಿದ್ದು... ಹೋ.. ಒಬ್ಬೊಬ್ಬರದು ಒಂದೊಂದು ತರಹದ ರೈಲುಗಳು ಮೆಟ್ರೊ ವೇಗದ ಜತೆ ಭರಗುಟ್ಟಿದವು.
ನಗರದ ರಸ್ತೆಯ ಮೇಲೆ ದೈತ್ಯನಂತೆ ಎದ್ದು ನಿಂತ ಪಿಲರ್ಸ್, ಎದೆಯ ಮೇಲೇ ಮಲಗಿದಂತೆನಿಸುವ ಸೇತುವೆ, ಅದರ ಮೇಲೆ ಕಾಲದ ಎಲ್ಲ ಜಡವನ್ನು ದರ ದರ ಎಳೆದೊಯ್ಯುವಂತೆನಿಸುವ ಮೆಟ್ರೊ ರೈಲು. ಕೆಳಗೆ ಮತ್ತದೇ ಆಟೊ, ಗಾಡಿ, ಕಾರು, ಬೈಕು ಟ್ರಾಫಿಕ್, ಹಾರ್ನ್, ಪೊಲೀಸ್ ಸೀಟಿ, ಜನರ ಸದ್ದು ಗದ್ದಲ... ರಸ್ತೆ ದಾಟಲು ಪರದಾಡುತ್ತಲೇ ಇರುವ ಪಾಪದ ಪಾದಚಾರಿ...
ಹೊರ ನೋಟಕ್ಕೆ ಕಾಣುವ ಬದಲಾವಣೆ ಒಳನೋಟದಲ್ಲೂ ಕಾಣುವುದು ಯಾವಾಗ?
ಕಾಮೆಂಟ್ಗಳು